Spesialpremiane

Mia Gøytil og mannen har vore aktive nøtteknekkarar i mange år, og begge bidrar med gode kommentarar jamt og trutt. I den interne konkurransen over kjøkkenbordet stakk i år Mia av med sigeren, for ho fekk fleire publisert fleire kommentarar enn husbond Sven-Ruben. Dei to driv småfeproduksjon i Vinje i Vest-Telemark.

Men det var ikkje kommentarane som sikra Mia premie i år. Ho er trekt ut mellom dei som kan vise til imponerande 24 rette svar. BG-nissane tek av seg lua og bukkar i respekt og beundring til denne verdige representanten for våre mange fantastisk standhaftige og kunnskapsrike nøtteknekkarar. Premien er eit hydraulisk toppstag frå Byberg.

Gode kommentarar i hopetal

Noko av det som er kjekt med BG-nøttene, men som også krev mykje arbeid, er å plukke ut eit lite nok utval kommentarar som vert publiserte i etterkant. Nøtteknekkarane har god formuleringsevne og rik fantasi. Ofte er det ikkje dei lange utgreiingane som skal til heller. Som då vi spurde Kva skjedde sist du feilkopla? Innimellom øydelagte hydraulikkblokker og sprengde sikringar kom slikt som denne: Det ble en gutt.

Andre har sendt oss eit lite dikt kvar einaste dag gjennom heile adventstida. Beint ut imponerande. Nissane har fått ta del i kvardagsgleder, høgtidstankar, skjemt og alvor. Kvardagsliv, samliv og bondeliv. Og skulle gjerne gitt ut premiar til veldig mange, for det å velje nokon få følest urettferdig mot dei mange som har engasjert seg utan å vinne. Men nissane har klart å bestemme seg. Avgjerda er endeleg og kan ikkje ankast, men du får nye sjansar førstkomande desember. Ver klar, tida går fort!

Traff spikaren på hovudet

– Kjenner du han her? spør gamlenissen (som ikkje er så veldig gammal, men eldst av dei to).

– Øh, nei, kvifor spør du slik? svarer yngstenissen (som tar til å bli nifst gammal han også).

– Fordi det ser ut som om han kjenner deg veldig godt! seier gamlenissen. – Såpass at eg trur vi må gi han ein premie!

Og sånn gjekk det til at Runar Olsen frå Rasta vann seg ei Japa strøvogn frå Sisu, så han kan gå trygt over tunet uansett vêr og føre. Alt han trengde å gjere var å kome med denne treffande analysa, då nissane spurde kven han ville helse til, på sjølvaste julaftan:

Det må bli BG-nissen det.

Som jeg mistenker tok Hellbillies-konserten helt ut. Og som rangla rundt på Agroteknikkmessa om nettene, og sovner helt utslitt 29. november. Bråvåkner dagen etter, av og ha på følelsen at noe er på gang, men finner ikke svaret før han tar en titt på kalenderen, 1. desember i morgen? Klarerer og samle tanken, roter rundt i redaksjonens fotoutstyr for å se om det er noen brukbare bilder fra Agroteknikkmessa som kan brukes i første spørsmål. Fremdeles i lykkerus etter og ikke ha blitt tatt på de nattlige vandringene på messeområdet. For deretter og levere med glans til 1. desember. Settere seg så ned og tar jobben på alvor og regner med at resten av kalenderen skal gå greit, har jo begynt og få lang erfaring må vite. Men den som tror verden skal være lett må tro om igjen. Nissen er jo som de fleste andre redd for forandringer, og nå mitt i julekalendertiden som han har fått sånn dreisen på, etter en litt stressende start, har han hørt at de skal rotte med nettsiden hans. Nissen begynner og forstå at noe alvorlig er på gang. Tenker hva gjør jeg nå, må jo forsikre meg at dette skal gå, selv om han er pessimisten selv. Og derfor utsetter svarfristen for 15. desember med en hel dag. Etter nå ha levert sitt siste bidrag for 2015, håper jeg Nissen får en roligere start på neste års kalender. Han har da ikke noe Agroteknikkmesse og ranglerundt på om natten.

Tidleg på'an

Ein annan kar som har utmerka seg er åtte månader gamle Teo Martin Roble Johnsen frå Vallersund. Trass sin svært unge alder står han oppført med 24 rette, og han har kommentert aktivt. Her er eit lite utval.

Ditt forhold til pussing? Puss puss så får jeg en suss. To tenner nede, men ingen oppe. Puss puss så får jeg en suss.

Og du køyrer sikkert, sant? Må jo det, 5-punkt-sele i bilen, og sannelig setter mamma meg i 5-punkt-sele ved middagsbordet også.

Kva er det viktigaste du les gjennom året? Kan ikke lese selv, liker at pappa leser om de tre bukkene bruse, men eventyret om pannekaka er kjedelig. Best er når farmor synger ride ride ranke.

Kva er det beste du har gjort i år? Jeg ble født i april, også har jeg verdens beste mamma og pappa.

Har du noko slags favorittvæske? Selv om jeg snart er 8 måneder, og stor gutt, syns jeg melken fra mammas pupp er best i verden.

Kva skala driv du i? Er for tiden i 1:3 skala. Gleder meg til jeg er på 1:2,5, for da rekker jeg opp til duker, blomsterpotter og andre spennende ting.

Er du på rett plass? Ja, jeg holder meg alltid i nærheten av maten, og det er helt riktig plass for meg.

Dame? Jeg er veldig glad i damer, mamma sier jeg er lik pappa'n min.

Noko som senkar seg der i garden? Her senkes alt for lite, så jeg må reise meg for å rekke opp.

Om du var landbruksminister for ein dag.... Gratis melk til alle under 16 år, og støtte til alle bønder som vil begynne å dyrke sjokolade.

Har du retten på di side? Hos farmor får jeg alle rettene.

Kva vil du helst bli servert? Lutefisk med ribbefett er nesten like godt som pupp.

Nissane vil ikkje bli så veldig forundra om mamma Cyrel og pappa Jo-Anders Johnsen har hjelpt Teo med eit og anna svar, og kan hende attpå alt bistått i å skrive inn kommentarane.

I alle høve får Teo to sett med hovudlykter og to sett med broddar frå i-mekfolka i Felleskjøpet, så kan han be med mamma og pappa ut på kveldstur uansett føre.