Fram og tilbake er like langt

Vi skal ikkje gløyme John Deere, på ein svært så suveren førsteplass. Så solid og så langt framom resten at det nesten ikkje er meir å seie om det.

På dei neste plassane er det større intensitet. New Holland er oppe på andreplass, ein traktor framom Valtra, som i sin tur er åtte traktorar framom MF. Held det fram slik, kan det bli interessant å følgje med.

Glimt av pluss hos A-K

Både New Holland og CaseIH ser ut til å ha snudd den langvarige nedturen frå 2015. Begge har forsiktig pluss i teljinga. Ikkje dei store tala, men ein tendens som sikkert er hyggeleg å merke seg for dei det gjeld.

Mot normalt

Valtra og MF har litt større utslag i sine registreringstal, men i negativ retning. Det er slett ikkje normalt at merka på andre til fjerdeplass på registreringsstatistikken alle ligg i området 12,0 til 13,7 prosent marknadsandel. Det normale er at spennet er frå 10 til 18 prosent. Men så er det da også ymse unormalitet i vente på den norske maskinmarknaden, og Valtra og MF er begge påverka av det spelet.

Fendt festar grepet

Nest største framgangen frå i fjor har Fendt, som tar til å få skilt på ein god stabel traktorar av nye 300-serien som vart kontraktsfesta i fjor. Det kan sjå ut som at Fendt er i ferd med å styrke posisjonen sin i Noreg.

Små utslag vidare

På plassane bak Fendt og CaseIH er det ingen veldig store utslag. Claas er heilt identisk med februar 2015, McCormick har ein høvesvis stor tilbakegang i prosent, men elles snakkar vi om null til tre traktorar opp eller ned mot fjoråret.

Importørane

Felleskjøpa er klart i tet med sin tredel av kaka. Eik og A-K tar nesten 21 prosent kvar, mens Lantmännen er på 17 prosent. HCP har mellom fire og fem prosent og Lena/Aase har to prosent.

Totalmarknaden går ned 18 traktorar i februar i år mot februar i fjor. Takka vere ein sterk januar 2016 er året så langt 48 traktorar og 11 prosent betre enn dei to første månadane i 2015.