MF: 4 syl, 200 hk

Den franske traktorprodusenten fornyar sine store firesylindra traktorar, og toppar det heile med å dra makseffekten opp til 200-streken. Vel å merke medrekna ekstraeffekt.

Firaren frå Agco Power er på 4,9 liter, og klarer seg med SCR og dieseloksidasjonsfilter for å nå utsleppskrava i Steg 4, med andre ord eit vedlikehaldsfritt system for eksosrens. Same motor, men med effekt heilt ned til 120 hk, finn du også i dei fem mindre modellane i 6700-serien.

Akselavstanden er 2,65 meter og svingradiusen held seg innanfor 4,75 meter. Massey Ferguson meiner med det å ha den smidigaste 200-hestaren på marknaden.

Dette betyr at 6600-serien får avløysing. For folk som ikkje kjenner MF i detalj, vil det vere vanskeleg å sjå skilnad på utgåande og ny serie. Eksteriøret er i stor grad likt, og hytta framstår som lik, men under skalet er der vesentlege endringar. Først og fremst motoren, men også detaljar på transmisjonsstyring, hydraulikk, bakstuss og ymse punkt i hytta er gjort om.

Mens du også kan velje Dyna-4 på dei tre minste modellane i 6700 S-serien, står valet mellom Dyna-6 og trinnlause Dyna-VT på dei tre største modellane. Transmisjonsalternativa går elles fram av tabellen som du finn ved å klikke deg gjennom bileta i toppen av artikkelen.

Du kan lese meir om 6700 S-serien og spesielt 6718 S i førstkomande utgåve av Bedre Gardsdrift. Traktoren er kandidat til Årets Traktor. Bedre Gardsdrift har prøvekøyrd og sjekka detaljane.