Gardsnamnskilt til Brandbu
Gudbrand Hoff frå Hadeland kan snart gjere det ekstra klart og tydeleg for folk kor han held til. Den ferske bonden vann gardsnamnskiltet i BG-nøttene julaftan.
Gudbrand har no drive gard i eige namn i ganske nøyaktig eitt år. Før det forpakta han delar av produksjonen i fire år, og han trivst godt med arbeidet. Eller: Veldig godt, for å vere presis.
Drifta omfattar 750 mål med korn og poteter, der kring 50 dekar er potet. Det er ikkje meir enn det må vere, for å forsvare maskiner og innsats. I tillegg driv han smågrisproduksjon, som sikrar at han kan drive som heiltidsbonde. Gudbrand har 26 purker med åttevekers puljedrift, og han er medlem i purkering. Den årlege produksjonen på kring 2000 smågris blir seld.
– Eg har vore med på BG-nøttene i mange år, og det er ein fin førjulstradisjon. Målet er 24 rette kvart år, og det brukar eg stort sett å klare, kommenterer Gudbrand.
Så er da nok også bakgrunnskunnskapen brukbart grei. Før han tok til å pakte gard, studerte han på Blæstad. Rett som det er ser han at lærdomen derifrå kjem til nytte, i tillegg til at skulegangen også førte med seg eit kontaktnett som har ein fin verdi.
